На армискиот полигон „Криволак“ – еден од најдобрите полигони во овој дел од светот (како што рече премиерот Зоран Заев), денеска се одржа воената вежба „Одлучен удар 21“ на Армијата на Република Северна Македонија заедно со армиите на нашите НАТО сојузници САД, Грција и Бугарија. Во присуство на највисокиот политичко-воен врв на Северна Македонија и високи гости од САД и сојузниците, беа презентирани офанзивни операции и активности на пешадиските и специјалните единици од четирите Армии, со поддршка од хеликоптерите од воздухопловниот ВИНГ и воздухоплови Ф-16 од вооружените сили на Грција.
На настанот се обратија претседателот на Владата, Зоран Заев, Претседателот на Република Северна Македонија Стево Пендаровски и министерката за одбрана, Радмила Шекеринска.
„Горд сум на нашата Армија, на нашите офицери и војници, на нивната желба за усовршување и унапредување. Тие ги исполнуваат сите обврски и очекувања на достоинствен начин и на највисоко ниво рамо до рамо со нашите сојузници, не само дома, туку и со учеството во меѓународните мисии со кои се гарантира мирот во светот“, истакна премиерот Заев.
„Со членството во НАТО не сме повеќе сами. Северна Македонија никогаш повеќе нема да биде ниту ставена под прашалник, ниту изолирана од светот“, а со членството во Алијансата, таа стана фактор за стабилност во регионот и извозник на безбедноста, додаде Заев, упатувајќи честитки до сите учесници во реализацијата на вежбата.
„Денешното учество на претставници на нашата Армија заедно со нашите партнери од НАТО е резултат на високите достигнувања во техничката и воена подготвеност на нашите офицери и војници, но и на политичка визија со која се имплементираа највисоките демократски вредности“, заклучи премиерот, истакнувајќи дека овие активности го зајакнуваат нашето партнерство и се доказ дека „заедно сме посилни и дека заедно можеме повеќе“.
Претседателот Пендаровски порача дека со заедничкото планирање и организација на ваква вежба, Северна Македонија и САД го афирмираат долгогодишното стратешкото партнерство. Oваа вежба, посочи тој, има и важна регионална димензија.
„Во Одлучен удар учествуваат и претставници на армиите на Република Бугарија и Грција, со што го зајакнуваме билатералното партнерство со овие наши два соседа и во исто време ја интензивираме регионалната соработка во областа на одбраната и безбедноста“, рече Пендаровски.
Министерката за одбрана – Радмила Шекеринска, порача дека моќта на НАТО е во неговото заедништво и дека токму на оваа вежба се покажува единството, сојузништвото, подготвеноста и соработката која може да ја има само најмоќната воено-политичка Алијанса која светот ја познава.
„Вежбата ‘Одлучен удар 21’ покажува дека членството во НАТО навистина не е само формално достигнување кое ќе го запишеме на хартија и ќе кажеме дека е остварување на нашата стратешка цел. Членството во НАТО е секојдневна практична работа, заедничко вежбање и војување, работа на терен која ја легитимира и Армијата на Северна Македонија како рамноправна, усогласена, еднаква со сојузничките Армии“, рече Шекеринска, подвлекувајќи дека земјава сега е сојузник во НАТО кој ја гарантира безбедноста и сигурноста на своите граѓани, а заедно со сојузниците – и на сите граѓани во Алијансата.
Изминатите две недели, како што рече министерката за одбрана, пешадиските и специјалните единици на армиите на Северна Македонија, САД, Грција и Бугарија покажале дека дејствуваат како едно, дека „тие се моќта на НАТО, дека македонскиот војник во акција може да го довери својот живот на американскиот, на бугарскиот и грчкиот, или пак да го брани животот на секој свој сојузнички колега, додека се одвива акцијата“.
Шекеринска, исто така упати честитки до армискиот тим за беспрекорната организација, како и благодарност до САД за долгогодишната континуирана поддршка во зајакнување на способностите и интероперабилноста на нашата Армија.
Бригадниот генерал Џед Шаертл, заменик-командант за мобилизација на Вооружените сили на САД за Европа и Африка, изрази задоволство од присуството во Криволак и од можноста од прва рака да се види, како што рече, „импресивната можност“ за реално извежбување во овој полигон.
Оваа прва голема вежба по членството на Северна Македонија во НАТО, порача тој, ја покажува посветеноста на нашата земја и на земјите учеснички, на Алијансата, и покажува дека токму преку ваков тип на вежби ние учиме еден за друг, учиме за опремата и системите, за да можеме навистина да бидеме интероперабилни и меѓусебно да се поддржуваме.
Денот за високи гости го следеа и претседателот на Собранието – Талат Џафери, министрите за внатрешни работи, здравство и финансии – Оливер Спасовски, Венко Филипче и Фатмир Бесими, министерката за одбрана на Црна Гора – Оливера Ињац, началникот на Генералштабот – генерал-потполковник Васко Ѓурчиновски, висока делегација од државата Вермонт (САД), амбасадорите на САД – Кејт Мери Брнз, на Грција – Русос Кондурас, и на Албанија – Фатос Река, претставници од собраниската комисија за одбрана и безбедност, високи воени и цивилни претставници на вооружените сили и министерствата за одбрана на САД, Бугарија, Грција и НАТО, командантот на бугарските специјални сили – генерал-мајор Јавор Матеев, командантот на SEEBRIG – генерал-мајор Аристидис Илиополос, како и одбранбени аташеи акредитирани во земјава.
Вежбата „Одлучен удар 21“ на полигонот „Криволак“ е дел од најголемата НАТО вежба „Defender Europe21“ која годинава се одвива во Европа. Во „Одлучен удар 21“ учествуваат 1.500 припадници на вооружените сили од 4 земји членки на НАТО – Северна Македонија, САД, Грција и Бугарија. Вежбата започна на 17 мај и ќе трае до 02 јуни. Целта на вежбата е демонстрација на високо ниво на интероперабилност, борбена подготвеност и извежбување на Лесниот пешадиски баталјон со сојузничките армии како и зајакнување на соработката на конвенционалните и специјалните сојузнички сили.
* Фото: Влада на РСМ / Министерство за одбрана
