Центарот за култура во Кичево оваа година ќе прими вкупно 2.170.000 денари за поддршка на 25 значајни проекти на македонски и албански јазик. Од оваа сума, најмногу средства, односно 350.000 денари, ќе бидат распределени за организирање на меѓународниот фолклорен фестивал „Д-р Владимир Полежиноски“, кој има за цел да промовира народни песни и ора.
Во листата на финансираните проекти се вбројуваат и Денот на албанската азбука и младинската керамичка работилница во Вранештица, кои ќе добијат по 200.000 денари. Останатите проекти ќе добијат финансиска помош со помали суми, изјави портпаролката Маја Николоска-Сиљаноска.
Според планот на Министерството за култура, ќе бидат поддржани пет проекти од библиотечната дејност, од кои најголем дел од средствата ќе се искористат за купување на книги на два јазика, македонски и албански, по 175.000 денари секој. Во драмската сфера, се предвидува реализација на две претстави: „Господин Колперт“ од Дејвид Гизерман во режија на Михајло Петрески и „Братство или интерес“ од Кристо Глоѓи, секоја со буџет од 70.000 денари.
Во областа на визуелните уметности, архитектурата и дизајнот, поддршката ќе се прошири на шест проекти, а младинската керамичка работилница ќе добие највисок износ од 200.000 денари. Што се однесува до музичките и сценските уметности, планирано е да се поддржат осум проекти, со најголеми средства, по 100.000 денари, за училиштата за народни танци и песни на македонски и албански јазик. Во литературниот сектор, единствената иницијатива што ќе добие финансиска поддршка е Денот на македонската азбука и јазик и тоа со износ од 50.000 денари, како што истакна портпаролката.
