Украина мора да исполни голем број други услови за да влезе во НАТО, изјави денеска Џон Кирби – советникот за национална безбедност на американскиот претседател Џо Бајден, со што Белата куќа одговори за острите коментари на украинскиот претседател Володимир Зеленски, кој денеска ги критикуваше лидерите на НАТО затоа што, очигледно, Украина нема да добие временска рамка за приклучување кон Северноатлантскиот договор на самитот на Алијансата што во моментов се одржува во Вилнус.
„Брзото членство е малку веројатно, тоа би значело дека НАТО е во војна со Русија“, кажа Кирби.
„Ние веруваме дека НАТО е во иднината на Украина. Тоа е нешот на што Сојузот се согласи уште во 2008 година“, изјави Кирби за Си-ен-ен.
„Сега постојат реформи – добро владеење, владеење на правото, политички реформи – на кои Украина треба да работи, и ние разбираме дека е тешко да се работи на некои од тие реформи кога сте во војна. Се разбира, тие се во војна. Членството во НАТО во блиска иднина затоа е малку веројатно, бидејќи тоа би го ставило НАТО во војна со Русија“, додаде тој.
Сепак, Кирби призна дека ги разбира фрустрациите на Зеленски, кој на Твитер ги критикуваше дискусиите за можниот пат до членство во НАТО на самитот во Литванија и порача дека неизвесноста (за Украина) ја мотивира Русија, а „колебливоста е слабост“.
Зеленски истакна дека е апсурдно на Самитот во Вилнус да не ѝ се понуди на Украина членство во НАТО и подвлече дека Украина заслужува почитување.
„Се чини дека нема подготвеност Украина да биде поканета во НАТО или да стане членка на Алијансата. Тоа значи дека е оставена можност да се преговара за членството на Украина во НАТО во преговорите со Русија. А, за Русија тоа значи мотивација да го продолжи својот терор“, посочи Зеленски.
„Да, има фрустрации, желба за брзо завршување на оваа војна, ние го разбираме сето тоа. Се разбира, споделуваме многу од тие грижи“, изјави Кирби.
Извор: МИА
