Apple патентираше технологија за блокирање на камерите на концертите

Обожавателите често сакаат да ги снимаат концертите од почеток до крај, по што снимките обично веднаш завршуваат на друштвените мрежи, со што се овозможува увид во шоу-програмата на одредени музички ѕвезди.

За да го спречи ова, компанијата Apple патентираше метод за онеспособување на камерите на ајфоните – било корисниците да се на музички концерт, во кино или на други локации каде што е забрането фотографирање и снимање.

Се работи за „инфраред“ емитер кој се поставува на локацијата и создава сигнали кои ги блокираат камерите. Кога ајфонот ќе прими ваков сигнал и ќе ги декодира податоците, камерата автоматски се блокира, а ако корисникот проба да ја вклучи, екранот ќе стане црн и ќе се појави нотификација која ќе го извести дека камерата е онеспособена и снимањето е забрането, се вели во описот на патентот.

Со оглед на тоа дека е само патент, не се знае кога и дали Apple воопшто ќе ја имплементира таа технологија. Ако тоа се случи, дефинитивно ќе му даде на светот уште малку дистописки шмек.