По допрен глас и согласно членовите 92 и 85, Државната комисија за спречување на корупцијата ќе го „чешла“ и имотот на претседателот Ѓорге Иванов, соопшти денеска претседателката на ДКСК – Билјана Ивановска.
Целта на проверката е да се утврди со колку имот се стекнал претседателот во заминување, кое ќе се случи на 12 мај годинава, во текот на своите два мандата.
Освен предизборните унапредувања и именувања во Армијата кои Иванов ги потпишал во предизборен период, Антикорупциска ќе ја проверува и информацијата објавена од „ТВ 24“ – дека Иванов купил два стана на Водно, кои во катастарската документација се на име на неговиот син Иван.
Од Кабинетот на претседателот реагираат дека указите се донесени на предлог на Министерството за одбрана и Генералштабот на АРМ, согласно нивните надлежности, при што се испочитувани одредбите од Изборниот законик и одредбите од Законот за спречување на корупција. Што се однесува до становите, од Кабинетот тврдат дека се работи само за еден стан, за чие купување е подигнат и кредит, а кој не е внесен во имотниот лист затоа што се уште не е исплатен.
