Најавата доаѓа помалку од еден ден откако договорот за прекин на огнот стави крај на најсмртоносниот конфликт меѓу Израел и милитантната група поддржана од Иран, но Израел сè уште се бори со својот втор непријател, палестинската милитантна група Хамас, во Појасот Газа
Администрацијата на американскиот претседател Џо Бајден е чекор поблиску до реализација на продажбата на пакетот со оружје за Израел од 680 милиони долари, изјави американски официјален претставник запознаен со планот, и покрај прекинот на огнот со посредство на САД меѓу Израел и либанската вооружена група Хезболах.
Пакетот, кој прв го објави „Фајненшл тајмс“, вклучува илјадници комплети за муниција за директен напад (ЈДАМ) и стотици бомби со мал дијаметар, рекол претставникот кој сакал да остане анонимен.
Најавата доаѓа помалку од еден ден откако договорот за прекин на огнот стави крај на најсмртоносниот конфликт меѓу Израел и милитантната група поддржана од Иран, но Израел сè уште се бори со својот втор непријател, палестинската милитантна група Хамас, во Појасот Газа.
Овој пакет ќе следи по 20 милијарди долари вредната продажба на борбени авиони и друга воена опрема на Израел во август.
Ројтерс во јуни објави дека Вашингтон, најголемиот сојузник на Израел и снабдувач со оружје, испратил повеќе од 10 000 високо деструктивни бомби со тежина од околу 925 килограми и илјадници ракети „Хелфајр“ до Израел од почетокот на војната во Газа во октомври 2023 година.
Во говорот доцна во вторникот, израелскиот премиер Бенјамин Нетанјаху ја наведе потребата од надополнување на резервите на оружје како една од причините за прекинот на огнот.
„И ова го кажувам отворено, не е тајна дека има големи доцнења во испораката на оружје и муниција. Овие доцнења ќе бидат решени наскоро“,
рече тој.
На пакетот се работело веќе неколку месеци.
Некои сенатори изразија загриженост за пакетот поради загриженоста за хуманитарната катастрофа со која се соочуваат Палестинците во Газа.
Бајден е силен поддржувач на Израел откако вооружени лица предводени од Хамас во октомври 2023 година влегоа на израелска територија и убија 1 200 луѓе, а зедоа и повеќе од 250 заложници.
Повеќето од 2,3 милиони жители на Газа се раселени, а енклавата е на работ на глад, по повеќе од една година од израелската војна против Хамас во Газа.
Здравствените власти во Газа соопштија дека повеќе од 43 922 Палестинци се убиени во израелската офанзива.
