Четвртиот по големина урбан центар во Германија, Дрезден, изобилува со споменици на културата, кои би требало да се најдат на списокот за посета на секој авантурист и патник.
Но, можеби најважен од сите е Зелениот трезор, кој се наоѓа во Резиденцијалната палата. Таму може да се најде најголемото богатство на стариот континент.
Резиденцијалната палата во Дрезден, позната и како Замокот Дрезден, речиси 400 години била седиште на владетелите и кралевите на Саксонија. Оваа импресивна градба е позната по тоа што во неа се вклопени, на крајно необичен начин, повеќе архитектонски стилови, почнувајќи од барок, па сѐ до нео-ренесанса.
Овој замок првпат бил подигнат околу 1200-та година, во форма на средновековно утврдување. Дури кон средината на 15-ти век започнале интервенциите и доградбите. Како што одминувале годините, грандиозниот објект полека го добивал својот денешен изглед, кој претставува мешавина од повеќе архитектонски стилови. Во текот на Првата светска војна замокот претрпел големи оштетувања, а сѐ до 1960 година немало позначајни обиди да се изврши реставрација. Оттогаш започнува комплетната реставрација, која е планирано да заврши во 2013 година.
Денес, Резиденцијалната палата во Дрезден е дом на неколку музеи: Нумизматичката соба, Колекцијата на печатени материјали, цртежи и фотографии, Турската соба, Уметничката библиотека (заедно со менаџментот на државната колекција на уметност на Дрезден), но можеби најважен и најпрочуен дел од историските поставки е Зелениот трезор.
Зелениот трезор претставува уникатен историски музеј во кој се собрани најголемите богатства во Европа. Во него се собрани експонати од непроценлива вредност, од цела Европа, а и пошироко, кои датираат од Барок до Класицизам. Трезорот е именуван според зелените столбови во првите неколку соби кои биле користени како дел од изложбата. Го основал Август II Силниот, владетел на Саксонија, во 1723 година.
Денес, импресивниот Зелен трезор е поделен на два дела: историски и нов. Во историскиот дел е прикажана реконструираната верзија, онака како што била поставена пред речиси 3 века, а во новиот се изложени индивидуалните експонати кои подоцна биле додадени во колекцијата, во посебни соби.
Кога ќе го посетите замокот во Дрезден, побарајте го најголемото богатство во Европа на првиот и вториот кат од западното крило.
Текстот е објавен во соработка со Iguana.mk
