Големите екрани на инфозабавниот систем имаат одлична резолуција на сликата и јасност на приказот, а нивниот софтвер е генерално многу интуитивен, добро дизајниран и брзо реагира на дадените команди.
Сепак, и покрај долгогодишното инсталирање во возилата и практичните предности што ги носат, се чини дека возачите не се баш големи љубители на големите дисплеи на централната конзола на нивните автомобили. Особено кога пристапот до често користените функции, како што се контролата на климата или поставките за музика, вклучува „копање“ низ различни менија додека возите, кога возачот треба да се концентрира на патот напред и возилата околу автомобилот.
Покрај тоа што е опасно, возачите сметаат дека е и многу досадно, покажуваат резултатите од неодамнешното истражување спроведено од американската филијала на Hyundai (Hyundai Design North America – HDNA). Главниот заклучок од истражувањето е – возачите претпочитаат класични копчиња за избор на функции!
Возачите кои биле дел од фокус група која ја тестираше употребата на екрани на допир за Hyundai за контрола на различни системи и уреди во автомобилот „биле под стрес, нервозни и вознемирени“ кога сакале да контролираат нешто, но не можеле да го направат тоа.
„Тврдите“ физички копчиња за прилагодување на температурата, аудио системот или други функции додека возите се секогаш на истото место, за разлика од интуитивните, но сепак комплицирани менија на софтверот за инфозабавниот систем. „Копањето“ низ софтверски команди за приспособување на некоја функција бара повеќе внимание, т.е. да ги тргнете очите од патот и да се концентрирате на нив.
Затоа возачите сè повеќе ги отфрлаат како непрактични, бидејќи со „вистинските копчиња“ можат да се потпрат на својата меморија и без да го тргнат погледот од патот, да го вклучат греењето во автомобилот или да сменат песна што не им се допаѓа.
Hyundai признава дека првично биле импресионирани од „револуционерниот“ инфозабавен систем на Tesla – голем број функции интегрирани на едно место, до кои може да се пристапи преку еден голем екран. Сега, сепак, сфаќаат дека собирањето на сите функции на еден екран не е најдоброто решение.
„Колку повеќе стававме екрани на допир во нашите возила, толку повеќе се обидувавме да ги пренесеме контролите на различни системи на нив. Сепак, на луѓето тоа не им се допадна толку многу“, изјави заменик-претседателот на ХДНА, Ха Хак-су за јужнокорејскиот весник на англиски јазик Korea JoongAng Daily.
Затоа, корејскиот автомобилски гигант веќе планира да ги врати старомодните „копчиња“ на своите нови и „освежени“ модели. Затоа претстојниот „освежен“ електричен Ioniq 5 за 2025 година доби редизајниран HVAC контролен панел, односно „физички“ контроли за климатизација.
Европската програма за проверка на безбедноста на новите автомобили – Euro NCAP, која детално ја тестира и проценува безбедноста на новите модели, неодамна објави дека од 2026 година, производителите ќе мора да инсталираат физички копчиња за одредени функции во своите автомобили доколку сакаат да добијат пет ѕвезди, односно највисока можна оцена за безбедност на нивните возила.
