Граѓаните на Молдавија ќе гласаат в недела на претседателските избори и на референдум за ЕУ, што доаѓа во клучен момент на конфликтот меѓу Русија и Западот за иднината на оваа сиромашна земја на југоистокот од Европа, која има помалку од три милиони жители.
Додека војната во Украина беснее, Молдавија го забрза своето настојување да се оддалечи од орбитата на Москва и започна долг процес на пристапување кон ЕУ, наведуваат локалните медиуми.
Про-западната претседателка Маја Санду (52) се надева дека ќе обезбеди втор мандат и поддршка на референдумот за да се потврди пристапувањето кон ЕУ како стратешка цел во уставот. Анкетите укажуваат дека Санду може да победи на изборите каде што се натпреваруваат 11 кандидати, како и дека мнозинството ќе го поддржи пристапувањето кон Унијата.
Маја Санду се очекува да добие 36 проценти од гласовите во првиот круг, според неодамнешното истражување на молдавскиот тинк-тенк WatchDog. Експертите сметаат на нејзина „веројатна” победа во вториот круг на 3 ноември. За претседателката, која за четири години го утврди меѓународниот статус на земјата и постигна отворање на преговори со ЕУ, „не е возможно да се застане на половина пат“. Против корумпираните олигарси, „нашата генерација има мисија да ја интегрира слободна и демократска Молдавија во големото европско семејство“, вели таа.
Владата ја обвинува Русија и земјите блиски до неа дека се обидуваат да влијаат врз изборниот процес плаќајќи на десетици илјади лица за да гласаат поинаку.
– Тоа е пресметан, обемен напор насочен кон дестабилизирање на нашата иднина и изместување од патот кон ЕУ, рече советничката за надворешна политика на претседателката, Олга Рошка. Таа нагласи дека повеќе од 100 милиони евра се испратени за манипулација со гласовите.
Полицијата вели дека мрежа управувана од Русија подмитила 130.000 гласачи да гласаат „не“ и да поддржат кандидати што ги претпочита Москва – што, според политичкиот аналитичар од Кишињев, Валериу Паша, претставува речиси 10 проценти од вообичаениот одзив на гласачите.
Меѓу лажните информации и масовниот систем на купување гласови, „руското вмешување достигна ниво без преседан“, се наведува во студијата на институцијата New Strategy Center со седиште во Романија.
Проруските партии започнаа кампања за бојкот и доколку не се постигне прагот од 33 проценти регистрирани гласачи потребен за потврда на резултатите од референдумот, европскиот пат на Молдавија би бил ослабен.
Полицијата, исто така, рече дека криминални групи поддржани од Русија сакаат да го попречат гласањето, дури и со заземање на државни згради, додека минатиот месец властите блокираа низа руски интернет страници со вести.
