Ослабената загрепска Цибона немаше никакви шанси против фаворитот белградски Партизан во третото коло од регионалната АБА лига, домашните кошаркари победија со убедливи 113:78 (34:20, 29:27, 28:19, 22:12).
На Цибона поради здравствени проблеми на овој меч ѝ недостигаа неколку значајни поединци, а дека хрватскиот претставник ќе биде поразен во овој дуел беше потврдено веќе по првата четвртина. По десет минути Партизан водеше со 34:20, а до крајот и двете екипи не обраќаа премногу внимание на одбраната и белградските „црно-бели“ до крајот остварија 35 поени предност.
Марио Накиќ со 18 поени беше најдобар стрелец на Партизан, а додаде и пет скока и четири асистенции. Цибона ја предводеа Ентони Барбер со 20 поени и Питер Џок, кој имаше 13 поени и четири скока.
Кошаркарите на Сплит претходно во неделата ја постигнаа првата победа, изненадувајќи ги своите навивачи и ја совладаа Црвена ѕвезда со 85:78 (18:16, 19:23, 23:22, 25:17). Тоа е само трета победа на Сплит против Црвена звезда во регионалната лига, но и прва од 2012 година.
Партизан, Будуќност и Мега имаат максимални три победи во досегашниот тек од сезоната.
