Евреите не можат да се сметаат за окупатори на сопствената историска татковина, изјави израелскиот премиер Бенјамин Нетанјаху како одговор на денешната пресуда на Меѓународниот суд на правдата (ИЦЈ), највисокиот суд на Обединетите нации, дека израелските населби на Западниот Брег го прекршуваат меѓународното право.
-Ниту една погрешна одлука во Хаг нема да ја искриви оваа историска вистина, како и законитоста на израелското населување на сите територии на нашата татковина, рече Нетанјаху.
Претходно денеска, ИЦЈ издаде советодавно мислење во кое наведува дека политиката на Израел на палестинските територии претставува анексија на големи делови од овие територии, како и дека го нарушува палестинското право на самоопределување.
На Израел му беше кажано да го прекине присуството на окупираните територии што е можно поскоро, како и да ги прекине сите активности во своите населби во тие области.
ИЦЈ посочи дека е неопходно Израел да ја плати штетата предизвикана од окупацијата на палестинските територии.
