ЈУ. Детски културен центар – Карпош со гордост го најавува првиот организиран фестивал посветен на мјузикли за деца и млади, кој ќе се одржи на 4 и 5 јуни на сцената во киното Фросина при МКЦ во Скопје. Овој живописен настан, поддржан од Град Скопје, ќе претстави живи изведби на омилените приказни, нудејќи возбудлива можност за публиката од сите возрасти да ја доживеат магијата на мјузикот.
Фестивалот започнува на 4 јуни со „Приказната за генијалната Матилда“, изведена на македонски јазик од талентираните членови на Студиото за детски и младински мјзуикли Бродвеј Јуниор од Скопје. Фановите на Матилда нема да сакаат да ја пропуштат оваа шанса да пеат заедно со „Чудо“ (Miracle), „Кога ќе пораснам“ (When I Grow Up), Деца на револтот“ (Revolting Children) и други познати песни од оваа топла приказна за извонредно девојче со неверојатни моќи.
Возбудата продолжува на 5 јуни со спектакуларната изведба на „Кралот Лав“ од многу талентираните ученици од Интернационалното училиште QSI во Скопје. Ова шоу, изведено на англиски јазик, ви ветува дека ќе ја оживее африканската савана со незаборавните песни како “Circle of Life”, “Hakuna Matata“, “Can You Feel the Love Tonight” и други.
„Ова е уникатна можност да се видат на сцена омилените дизниеви филмови, каде раскошните мелодии се збогатени со раскошни костими. Мјузиклот, кој е сплет на сите уметности во едно, е реткост да се види на нашата сцена, особено кога децата настапуваат за деца. Веруваме дека овој фестивал ќе расте од година во година и ќе прерасне во меѓународен настан,“ изјави директорката на ДКЦ Карпош д-р Билјана Лалчевска Серафимовска. Град Скопје великодушно ја поддржа оваа иницијатива, истакнувајќи ја културната и едукативната вредност на музичкиот театар за младата публика.
Изведбите ќе започнат во 19:00 часот на двата дена во Кино Фросина при МКЦ. Искрена благодарност упатуваме на Здружението за инклузивно и неформално образование КРЕО – АКСИС од Скопје кое се јавува како соработник на овој фестивал.
Онлајн билетите се достапни сега на веб-страницата на МКЦ. Не ја пропуштајте оваа волшебна прослава на детскиот музички театар – прва од ваков вид во нашата земја!
За повеќе информации и за купување билети, посетете ја веб страницата на МКЦ.
