Димитар Ковачевски на денешната седница на партискиот Извршен одбор официјално го потврдил повлекувањето од функцијата претседател на СДСМ и побарал свикување конгрес и организирање внатрепартиски избори.
-Ковачевски го потврди повлекувањето на денешната седница на партискиот Извршен одбор на СДСМ која ја најави на 8 мај, како високо морален чин и согласно Статутот на партија иницираше свикување конгрес заради анализа на изборните резултати и изјаснување за довербата на органите на СДСМ, избрани од конгресот, со оглед на изборните резултати, информира СДСМ.
МИА во целост ја пренесува интегралната содржина на дописот на Ковачевски до Извршниот одбор и претседавачот на Централниот одбор, Славјанка Петровска:
Почитувани другарки и другари,
На 8 Мај 2024 година се одржаа парламентарните и вториот круг на претседателските избори во фер и демократска атмосфера, согласно европските стандарди, што претставува огромен исчекор кој е резултат на високиот степен на демократија, слободата на медиумите и на мирот и стабилноста која ја воспоставивме во изминатите години во државата.
Им благодарам на нашите членови и подржувачите кои и покрај големиот пораз во првиот круг на претседателските избори, достоинствено излегоа на изборите во вториот круг и овозможија да се постигне цензусот за избор на Претседател на Република Северна Македонија. СДСМ со тоа повторно покажа и ја докажа својата врвна државотворност и одговорност. Покажавме дека Македонија ни е најважна и секогаш ќе биде така.
На парламентарните и претседателските избори СДСМ доживеа пораз, со што му е зададен тежок удар, не само од граѓаните, туку и од симпатизерите, дел од сегашните, како и од доскорешни членови на партијата организирани во друг политички субјект, а стимулирани и од поранешни носители на високи партиски функции.
И јас и партиското раководство имаме одговорност, исто како што имаат одговорност и сите именувани и избрани функционери, вклучително и сите партиски функционери на локално и централно ниво. Никој реално не е без одговорност.
Овој резултат и креираното јавно мислење беше очигледно уште на локалните избори во 2021 година кога СДСМ доживеа пораз, по што партијата не направи анализа на изборните резултати како што налага Статутот и не ги лоцираше причините за поразот за да се извлечат соодветни поуки.
СДСМ ќе треба добро да погледне навнатре, да размисли што направивме и кои се резултатите и слабостите во последните 4 години, можеби и во последните 7 години. И уште поважно, што е тоа што треба да се направи за да ја обновиме и вратиме довербата на граѓаните што ја изгубивме. Процесот на обнова мора да е на сите нивоа.
Тој процес не смее да биде долг, но никако ни брзоплет, стихиен и експресен. Тој процес на длабока внатрешна промена и консолидација може да го изведат само оние кои се подготвени да се жртвуваат за иднината на партијата и демократијата во државата. Оние кои немаат багаж од било каков вид, особено не такви карактеристики, заради кои граѓаните го испратија СДСМ во опозиција и на локално и на централно ниво.
Согласно член 26 став 2 и став 4, барам да се свика Конгрес на СДСМ заради анализа на изборните резултати и изјаснување за довербата на органите на СДСМ, избрани од Конгресот, со оглед на изборните резултати, со следниот Дневен ред:
1. Избор на работно претседателство и Претседавач со Конгресот.
2. Реферат на Претседателот на СДСМ за периодот декември 2021 до Мај 2024 година.
3. Реферати на раководството
4. Извештај од ЦИШ за парламентарните и претседателските избори одржани во 2024 година.
5. Единствена расправа од делегатите на Конгресот по втора, трета и четврта точка.
6. Изјаснување за довербата на органите на СДСМ избрани од Конгресот.
Согласно член 68б став 3, а врз основа на изборните резултати на парламентарните и претседателските избори 2024 година, како и врз основа на очигледната пасивност на дел од членовите и симпатизерите на СДСМ, вклучително и најголемиот дел на избраните и именуваните функционери на централно и локално ниво, како високо морален чин се повлекувам од функцијата Претседател на СДСМ .
Истовремено повикувам истото да го направи целокупното раководство на партијата по вертикала од членовите на раководството, преку централните партиски органи, се до општинските органи на раководење на партијата.
Ваквиот чин е редовна постапка во сите европски и светски демократии, каква претендираме да бидеме и ние и треба да биде пракса на сите раководства на партијата по изборен неуспех.
Барам од ИО, Претседавачот со ЦО и ЦО на СДСМ да ги донесат сите потребни одлуки, акти и постапки согласно Статутот на СДСМ за организирање на Конгрес на СДСМ заради анализа на изборните резултати и изјаснување за довербата на органите на СДСМ и организирање на внатрепартиски избори согласно Статутот на партијата.
Првиот чекор во консолидацијата на СДСМ мора да биде обновување на идеолошката и вредносна матрица која ќе ги собере сите прогресивни сили на левиот центар во државата.
Вториот чекор, треба да биде длабока кадровска промена и создавање на силен кадровски потенцијал, со вистински и докажани социјалдемократи, со вредности и знаење, со чесност и енергија, со мотив и со искреност кон партијата.
Во овој процес на обнова согласно статутот мора сите да работиме со разум, искрено и со срце, без тесногради и ситни лични интереси. Треба да работиме во партиски интерес и да мотивираме во органите и телата на партијата да се вклучат лица кои ќе бидат препознаени од членовите на партијата и од граѓаните како автентични социјалдемократи, чиешто однесување е водено од принципите и вредностите на социјалдемократијата.
И трето, да се реформира организациската поставеност на партијата која ќе овозможи целосно консолидирање на СДСМ и враќање на победничките патеки.
Но, додека се случува овој процес на внатрешна обнова, ние не можеме и не смееме да ја занемариме нашата одговорност кон државата и граѓаните. И затоа СДСМ и коалицијата треба и мора да бидат одговорна, силна, принципиелна и државничка опозиција.
Актуелниот систем во кој живееме, води повеќе сметка за ПР-от отколку за суштината, за површината, отколку за длабината. Граѓаните со право се незадоволни и не веруваат во ништо. Многуте кризи придонесоа голем број наши граѓани да се иселуваат, да се чувствуваат несигурни, обесправени и без верба во својата држава. Корупцијата на секое ниво, личните интереси, долгата европска интеграција и изневерените очекувања на граѓаните, нискиот просечен раст на економијата во изминатите три декади, непотизмот, бизнис интересите, етничкиот професионализам, се само дел од крупните дефекти на системот, кој ја јаде и разорува државата и кој мора конечно да се промени. Таа промена треба да започне од СДСМ, која ќе може најпрвин да ја препознаат членовите и симпатизерите на партијата, за да може да ја препознаат и граѓаните.
Во изминатиот двегодишен период за мене беше најважно што во услови на најголема и тотална криза, никого не оставивме сам, се грижевме за сите, и за младите и за пензионерите, и за работниците и за земјоделците, ги зголемивме и платите и пензиите и ја намаливме невработеноста на најниско ниво по тешката и долга транзиција од деведесетите години. Кризите не ги користев како оправдување или бегство од проблемите. Напротив, работев како што знаев и умеев, искрено, директно, чесно и посветено да се помогне на државата и граѓаните и знам дека постигнавме многу и дека за дел од работите, времето ќе ме потврди дека бевме во право.
Како што кажав во изборната ноќ, им порачувам на сите оние кои мислат дека гласањето било против Европа или ќе се обидат да ја искористат можноста да го спречат природниот пат на Македонија кој води до Европската Унија, блокирањето на патот кон Европа не само што ќе донесе голем пад на нашиот животен стандард, туку ќе ги зголеми етничките тензии во земјата, ќе ги наруши односите со соседите и ќе не изложи на безбедносен ризик, кој никој не може навистина да процени колку може да биде голем. За земја како Македонија нема средина. Нема играње на две столчиња. Тоа е или напред или назад. Местото на Македонија е во НАТО и Европската Унија. Местото на Македонците со својот македонки јазик, македонска култура и македонски идентитет е во Европската Унија, место во кое припаѓаат и сите други граѓани на Северна Македонија без разлика на нивната етничка или верска припадност.
Ми беше чест што во овие повеќе од 2 години го предводев СДСМ, што ја предводев македонската Влада и тоа ќе го чувствувам како силен мотив за мојот понатамошен ангажман во застапувањето на социјалдемократските, прогресивните и евроатлантските вредности на нашата држава.
Сакам да се заблагодарам за соработката на моите соработници, во Владата и во партијата.
Сакам да им се заблагодарам на сите прекрасни членови на СДСМ кои и во најтешкото не калкулираа заради лични амбиции и интереси, туку се бореа за партијата, а не во партијата. Тие се најголемата вредност на СДСМ.
Поминавме заедно тешки години, години на кризи, години на тешки но големи одлуки за државата, бевме изложени на јавен притисок, неосновани закани и линч, се жртвувавме за нашата татковина, а поголема жртва од тоа нема.
Нема поголемо задоволство да работиш воден од социјалдемократските вредности во кои веруваш од најмлади години. Но, исто така, нема поголемо задоволство кога знаеш дека си дал се од себе за земјата во која си родени и која ја сакаш.
