Демократската унија за интеграција, во реакција во врска со инцидентот во М-НАВ, изрази „силна осуда за секоја форма на насилство“.
„Безбедноста на сите граѓани е најважна за нас. Настаните во М-НАВ се вознемирувачки и од државните институции се третираат со најголема сериозност. Истражните органи мора одлучно да го расветлат случајот“, се вели во реакцијата.
Од партијата велат дека инцидентот неправедно ѝ се припишува на ДУИ, а истиот, тврдат, е резултат на нарушени и заладени односи меѓу колегите во работната средина и нема никаква врска со политичкo прашањe, а уште помалку со нив.
„Станува збор за несогласување меѓу колегите и во никој случај не треба неправедно да се меша партиска политика.
Ја осудуваме тенденцијата за постојано мешање на партиите во секоја приватна секојдневна работа.
Демократската унија за интеграција го повторува својот став за владеење на правото и тоа дека никој не е над законот, но воедно и се спротивставува на осудувањето и притисокот на јавноста врз институциите“, велат интегративците.
