„Предвремено родените бебиња во болницата Ал-Шифа најголемата во градот Газа ги завиткуваме во пластична фолија и ги ставаме до топла вода во очајнички обид да ги одржиме во живот“, предупреди директорот на болницата Мухамед Абу Салмија.
Абу Салмија за телевизијата Ал Арабија изјави дека бебиња биле извадени од инкубаторите бидејќи не работеле, и откако веќе нема залихи на кислород и гориво и биле завиткани во фолија за да се загреат.
Вработените во болницата Ал-Шифа се борат да ги одржат во живот новороденчињата, а бебињата беа преместени од инкубаторите во неонатална единица во друг дел од болницата.
Светската здравствена организација соопшти дека болницата Ал-Шифа во градот Газа „повеќе не функционира како болница“ и дека бројот на смртни случаи во болницата „значително се зголемил“.
Утрово пак, Министерството за здравство во Газа управувано од Хамас, соопшти дека ниту една од болниците во северниот дел на Појасот не е оперативна. Јусеф Абу Риш, заменик-министер за здравство во Појасот Газа, управуван од Хамас, изјави дека сите болници на северот од енклавата „не работат“.
Во меѓувреме, продолжуваат да се водат интензивни борби меѓу израелските војници и милитантите на Хамас.
МИА
