Единствената исправна одлука на ЕУ е да ја награди Северна Македонија за напорите кои ги има сторено на патот кон Унијата, порача германскиот канцелар Олаф Шолц на самитот ЕУ- Западен Балкан во Тирана.
Шолц ја апострофираше Северна Македонија како земја која мора да биде наградена за своите напори да се приближи кон ЕУ, пренесува Дојче веле.
„Сакаме да направиме сѐ, за Северна Македонија да биде успешна во своите напори, и јас сум му многу благодарен за активностите на шефот на владата, кој вложува големи напори за да ги исполни условите кои беа наметнати однадвор. Мора да се каже дека Северна Македонија постигна голем напредок во исполнувањето на критериумите за пристапување и вложува многу напор. Во тој поглед, тоа е единствено исправно“, порача Шолц на прес-конференцијата на самитот.
Тој го повтори повикот за побрз влез на земјите од Западниот Балкан во ЕУ.
„Јасно е дека 20 години откако на овие земји им беше дадено ветување за влез, тоа мора и да се случи“, рече германскиот канцелар.
МИА
