Министерот за правда Кренар Лога испрати дописи до Амбасадата на САД, Делегацијата на ЕУ, Мисијата на ОБСЕ и Програмската канцеларија на Советот на Европа, со кои ги информира за неспроведувањето на пресудите на Европскиот суд за човекови права од страна на Република Бугарија, соопшти Министерството за правда.
Во дописот, што е испратен заедно со 14-те пресуди, посочено е дека се бара поддршка од меѓународната заедница во делот на унапредувањето и заштитата на човековите права.
„Исполнувањето на оваа цел подразбира постоење на континуирана заложба и за доследно почитување на меѓународните обврски кои Република Северна Македонија ги има превземено како земја која моментално е во процесот на евроинтеграции. Почитувањето на меѓународни документи е исклучително важен сегмент за кој особено земјите членки на ЕУ, но и земјите кои претендираат да добијат членство во ЕУ е неопходно да се залагаат“, стои во соопштението од МП.
Во соопштението се истакнува и дека меѓународната заедница е исклучително важен партнер на земјава и како таков е вклучена во сите реформски процеси, и е партнер кој несомнено цврсто и доследно се залага за почитување на владеењето на правото.
„Оттука, Министерството за правда смета дека е од особена важност да се актуелизира прашањето за неспроведувањето на пресуди на ЕСЧП, истакнувајќи ја потребата од поддршка од меѓународната заедница за доследно спроведување на пресудите на судот“, додаваат од Министерството за правда.
Извор: МИА
Фото: Министерство за правда
