Генералниот секретар на НАТО, Јенс Столтенберг, денеска во Брисел изјави дека Алијансата се согласила „да ѝ помогне на Украина да развие систем за набавки што ќе биде ефикасен, транспарентен и одговорен“, пренесе ДПА.
Во седиштето на НАТО во Брисел, првиот човек на Алијансата рече дека „НАТО треба да одржи состанок со експерти за набавки од Европската унија и Украина за да се увери дека Киев го има потребното оружје“.
„Мораме да ѝ го дадеме на Украина тоа што ѝ треба за да победи, пред Русија да го искористи моментумот“, рече Столтенберг.
Тој денеска зборуваше со украинскиот министер за надворешни работи Дмитро Кулеба и шефот за надворешни работи на ЕУ – Жосеп Борел, пренесе ДПА.
„Додека Русија почнува со нови напади, НАТО е сè повеќе загрижен дека Кина можеби планира да обезбеди смртоносна поддршка за руската војна“, рече Столтенберг, додавајќи дека Москва подава рака и кон Северна Кореја и Иран.
МИА
