„Очекувам на 4 февруари да има една достоинствена манифестација, достоинствено одбележување на годишнината од раѓањето на Гоце Делчев. Но, поважен е контекстот и сето она што се случува сега со Бугарија, тука се нашите главни забелешки. Се сруши како кула од карти политиката на оваа Влада на СДСМ и ДУИ кои во континуитет ја водат од 2017 година кога го потпишаа Договорот за добрососедство и пријателство со Бугарија за кој за жал се виде дека не е ни за добрососедство, ни за пријателство и последниве случувања и се виде дека таа политика на попустливост не дава резултати и не ја води Македонија никаде“, изјави потпретседателот на ВМРО-ДПМНЕ – Александар Николоски, во гостување во „Тема на денот“ во централниот Дневник на ТВ „Сител“.
Николоски подвлече дека целите на Бугарија се непроменети во последниве 150 години и Бугарија мисли различно од тоа што ние мислиме за себе – Бугарите мислат дека не постои македонски јазик, односно дека тоа е јазична норма на бугарскиот јазик и дека македонската нација е вештачка творба. Тоа се драматични разлики кои не можат да се спојат, оцени тој.
Николоски укажа дека ВМРО-ДПМНЕ сака да има достоинствено одбележување и затоа го вклучува Патриотскиот институт, бидејќи институциите под Владата немаат капацитет за достоинствено одбележување.
„Институциите се длабоко дерогирани во изминатите години, професионалноста е на многу ниско ниво. Вториот и посуштински дел е односот на Владата кон ова негаторско однесување на Владата кон Македонија и Македонците, затоа реков дека политиката на постојано попуштање доживува фијаско. Удрија во темелите на македонскиот јазик и народ и како никогаш порано од 1944 од АСНОМ до денес не се урнати повеќе позициите и никогаш повеќе не било удрено во темелите почнувајќи од потпишувањето на Договорот со Бугарија па сѐ до сега“, посочи Николоски.
