Претседателот на Србија, Александар Вучиќ, во Давос изјави дека Србија се соочува со критична година, која веројатно ќе е една од најтешките во модерната историја на политички и економски план.
Тој за медиумите од Србија на Светскиот економски форум во Давос изјави дека од разговорот може да се види дека единственото нешто што сите ги интересира се санкциите против Русија и независноста на Косово.
Како што рече, в петок ќе се сретне со претставниците на Германија, Франција, САД, на Италија и специјалниот пратеник на ЕУ за дијалог – Мирослав Лајчак, и оцени дека тоа ќе биде „многу, многу, многу тежок разговор со најголемите светски сили“.
Потоа, како што рече, ќе има консултации на државниот врв.
„В сабота и недела ќе ѝ се обратиме на јавноста со нови мерки и ќе кажеме што се бара и очекува од Србија во однос на Косово и Метохија и санкциите против Русија“, рече Вучиќ.
Прашан за изјавата на косовскиот премиер, Аљбин Курти, дека може да се постигне договор во следните неколку месеци доколку има волја, Вучиќ рече: „Тоа може да се направи задутре, доколку тој се откаже од своите сецесионистички намери“.
Тој додаде дека Европскиот парламент усвоил резолуција во која делот за Косово е многу попроблематичен од воведувањето санкции против Русија. Како што рече, тие го поздравија барањето за членство на Косово во ЕУ, повикаа на интензивирање на процесот на дијалог заснован на взаемно признавање и ги осудија ескалирачките потези на Србија, како и констатираа дека независноста на Косово е неповратна и ги повикаа земјите членки кои не го имаат признаено Косово да го сторат тоа.
Извор: МИА
