Градоначалникот на Пирот, Владан Васиќ, синоќа прогласи вонредна состојба во градот, откако во близина на местото Сопотски Хан се преврте вагон на композиција на товарен воз кој превезувал гас од амонијак. При инцидентот од вагонот истекол гас и во атмосферата е ослободена висока концентрација на амонијак, поради што 51 лице се хоспитализирани со симптоми на труење. Поради вонредната состојба денеска нема да работат училиштата во Пирот, јави дописникот на МИА од Белград.
Вагонот на товарниот воз што превезувал амонијак се превртел околу 17 часот и 30 минути на дел од пругата од Пирот до село Станичење, кај местото Сопотски Хан, соопшти српското МВР.
РТС јави дека до несреќата дошло кога композиција од 20 цистерни излетале од шините, од кои „најмалку една паднала во коритото на реката Нишава, што предизвикало бурна реакција на амонијакот во допир со вода“.
Одделот за вонредни состојби на српското МВР потврди дека се хоспитализирани 51 лице со симптоми на труење со амонијак, од кои две лица се со тешки симптоми. Во Универзитетскиот клинички центар во Ниш се пренесени седум лица, кои имаат стабилни витални параметри со надразнувачки симптоми и благи хемиски изгореници.
МВР ги повика граѓаните кои живеат во близина на несреќата да не ги напуштаат домовите и да не излегуваат на отворено.
На местото на настанот беа испратени 27 пожарникари со 10 противпожарни возила.
Поради несреќата железничкиот сообраќај на оваа пруга е во прекин.
Компанијата „Србија Карго“ се огласи и соопшти дека се работи за товарен воз кој секојдневно сообраќа на делницата Ниш-Димитровгад и превезува суровини од Бугарија до Прахово и Шабац.
Сопственикот на порталот Пирот плус онлајн, Ненад Пауновиќ, претходно изјави дека на потегот долг 30 километри од Бела Паланка до Пирот има силен мирис на амонијак, а видливоста е толку слаба, што некои автомобили излетале од патот.
„Жителите на Пирот се во страв, никој не излегува од дома“, посочи Пауновиќ.
Извор: МИА
