Премиерот Димитар Ковачевски ја осуди вчерашната изјава на бугарскиот пратеник и лидер на политичката партија „Преродба“ – Костадин Костадинов, кој при отворањето на Бугарскиот културен центар во Скопје изјави дека Бугарија и Македонија треба да се една држава и дека меѓу Бугарите и Македонците нема разлика.
„Министерството за надворешни работи веднаш реагираше, а исто така и министерката за култура тоа го осуди“, потсети Ковачевски, надоврзувајќи се на осудите.
„Исто така и јас сакам да го осудам. Навистина непримерно е човек којшто е дојден како гостин во оваа држава да се однесува на таков начин. Вчера ние имавме чин на отворање на Бугарски културен центар така како што личи, во Скопје, со министер за култура дојден, со нашиот министер за култура, на ист начин како што сум кажал дека и ние ќе отвориме Македонски културен центар во Благоевград, каков што имаме отворено и во Софија“, рече Ковачевски при денешната посета на фабриката „Брилијант“ во Штип, додавајќи дека такви политичари не се пожелни во државава, алудирајќи истовремено и на бугарскиот европратеник Ангел Џамбаски.
„Такви политичари како тој вчера, има уште еден којшто мене видеа ми правеше, можам слободно да кажам дека воопшто не се пожелни во нашата држава бидејќи, освен ширење на немир, освен ширење на нетрпение помеѓу граѓаните на двете држави само заради свој политички интерес, бидејќи тие немаат никаква друга политичка агенда освен да добиваат некакви ситни политички поени на провокација на чувствата на нашите граѓани, такви политичари воопшто не се пожелни лично за мене во нашата држава и воопшто не мора да доаѓаат тука“, нагласи Ковачевски.
Извор: МИА
