Западот игра „опасна, крвава и валкана“ геополитичка игра, но САД и нивните сојузници на крајот ќе мора да разговараат со Русија, порача рускиот претседател Владимир Путин денеска во бораќање на конференцијата на Меѓународниот клуб за дискусија „Валдаи“ во Москва.
„Таканаречениот Запад го стави целиот свет на коцка во оваа игра, а оваа игра е опасна, крвава и би рекол валкана“, беа зборовите на Путин, кој посочи и на поговорката која вели „како сееш, така и ќе жнееш“.
„Оние кои ги создаваат правилата, мислат дека другите немаат право на свој единствен пат“, обвини рускиот претседател, алудирајќи на Западот и секако, пред сѐ на САД.
„Би сакал да потсетам за рускиот предлог до нашите западни партнери. Тој беше турнат настрана“, истакна Путин.
Тој предупреди дека „човештвото има два избора“ – соработка или продолжување на проблемите.
„Човештвото има два избора: или ќе продолжиме со проблемите што ги оптоваруваат сите, или ќе работиме заедно. Верувам во здравиот разум, и секогаш сум верувал“, рече Путин, повикувајќи го Западот да работи на заедничка иднина со Русија.
Рускиот лидер, исто така, го обвини Западот дека инсистира на прифаќање на новите вредности „безусловно“ и дека е „заслепен од колонијализмот“.
Цитирајќи го предавањето од 1978 година на рускиот дисидент Александар Солженицин на Харвард, Путин рече дека Западот е отворено расистички и дека го гледа остатокот од светот со презир.
„Ова нивно верување во сопствената непогрешливост е опасна ситуација“, рече Путин, додавајќи дека Русија никогаш нема да прифати Западот да ѝ кажува што да прави.
„За разлика од Западот, ние не ѕиркаме во туѓите дворови“, вели тој. „А сепак, Русија не се смета за непријател на Западот“, рече Путин пред експерти од 44 земји.
Во продолжение на говорот, рускиот претседател индиректно ги спореди западните прогресивци со нацистите.
„Нацистите палеа книги. Западните прогресивци ги забрануваат Достоевски и Чајковски. Cancel културата (‘култура на поништување’) уништува сè што е креативно“, оцени Путин, додавајќи дека „историјата сè ќе исправи“ и дека историјата нема да ги „поништи“ големите историски личности, туку оние кои тоа го прават денес.
Тој повторно повика на мултиполарен свет.
„Би сакал да ве потсетам дека мултиполарниот свет е единствената шанса за Европа. Автономијата на Европа е многу ограничена“, рече Путин, додавајќи дека нема стабилност. „Како да разговараме со нив? Не е јасно“, рече Путин, додавајќи дека се прекршуваат потпишаните меѓународни договори. „Тоа е погрешна политика. Пат кој не води никаде“.
Во своето обраќање, Путин упати и порака до НАТО.
„Се обидуваме да соработуваме со големите земји, но тука е и НАТО. Имаме порака за НАТО: да престанеме да бидеме непријатели, да живееме во хармонија. Да одиме на дијалог, на мир“, рече тој.
„Постојано се врши притисок врз нас. Која е целта? Целта е да се направи Русија ранлива и да се направи алатка за постигнување на нивните цели. Тоа е тоа, секој е алатка. И оние кои не се согласуваат, кои не сакаат да бидат алатка, против нив се воведуваат санкции, економски ограничувања…“, продолжи Путин, додавајќи дека тоа не поминало и никогаш нема да помине кај Русија.
„Русија не ги предизвикува западните елити. Русија само го бара своето право да се развива. Русија не сака да создаде биполарен свет, не сака да владее со светот“, истакна тој.
Тој потенцираше дека новиот светски поредок мора да се заснова на право и правда, а светската трговија мора да биде поотворена и пофер и не смее да зависи од една земја.
„Дали е можно? Да“, рече Путин, обвинувајќи дека актуелната реалност е дека Западот го користи доларот како оружје.
„Што се случува денес? Западот продава фармацевтски производи, а потоа бара од земјите да ја уништат нивната фармацевтска индустрија“, наведе Путин како пример.
Што се однесува до Украна, тој рече дека „операцијата“ – како што ја нарекува инвазијата на таа земја, била резултат на тектонски геополитички промени.
„Ова не се нови промени во Украина, тие се случуваат со години. Овие тектонски плочи постојано се движат. Како што велат експертите, на почетокот сè е многу мирно. А потоа овие плочи навлегуваат една под друга, се појавуваат тензии, се случува земјотрес“, рече Путин.
„Пристигнуваат нови центри на моќ. Овие промени се случуваат од објективни причини. Некои центри на моќ исчезнуваат. Се појавуваат нови. Особено во Азија, но и во Африка. Африка е сиромашен континент, но има потенцијал“, рече рускиот претседател, споменувајќи ја и Јужна Америка.
Според него, овие тектонски промени резултирале со трагични настани во Украина.
„Ние не сме виновни за тоа“, рече Путин и додаде дека овие промени ќе се случуваат што и да прават. „Овие процеси се неповратни“, додаде тој.
Рускиот претседател истакна и дека постојано мисли на руските војници кои загинаа во Украина, но рече дека Москва немала друг избор освен да изврши инвазија.
„Се случуваат некои работи што луѓето не ги гледаат. На крајот работите излегуваат на виделина, стануваат јавни. Моравме да одлучиме што да правиме со Донбас. Луѓето живееја под оган осум години, тие сè уште живеат под оган. Затоа и го презедовме следниот логичен чекор, ги приклучивме кон Русија бидејќи немаше да преживеат сами. Ја почитувавме нивната волја“, рече Путин.
„Немавме друг избор освен да започнеме воена операција. Другата опција беше едноставно да чекаме. Да се вратиме во 2014 година“, рече Путин и потоа ја опиша ситуацијата во Украина во 2014 година. „Гледавме што се случува. Осум години градеа утврдувања, многу силни утврдувања. Добро разбравме дека овој процес ќе продолжи и колку понатаму оди, толку е поопасно за нас и ќе носи поголеми загуби. Затоа го направивме тоа. НАТО го прошируваше своето присуство во Украина. Овие утврдувања потоа би се појавиле и во други региони, на север, на југ“, рече Путин. Тој додаде дека ситуацијата за Русите би била поинаква доколку Украинците добиеле помоќно оружје, веројатно мислејќи на НАТО.
„Овие територии историски се родното место на Русија. Ние бевме една нација, еден јазик“, се врати Путин во средниот век. Потоа продолжи да зборува за историјата. Рече дека Украинците соработувале со Хитлер за време на Втората светска војна, дека тоа е дел од нивната историја, но дека во основа Русија и Украина се исти луѓе. „Значи, ова е граѓанска војна на некој начин, ние завршивме во различни држави“, рече тој, навраќајќи се и на Советскиот Сојуз. „Ленин ѝ го даде Донбас на Украина. Украина е вештачка земја“, заклучи рускиот претседател.
На прашањето која е конкретно целта на воената операција во Украина, Путин одговори: „Главната цел е да му се помогне на Донбас. Луганск е ослободен. Тие луѓе живееја како Руси, моравме да реагираме. Во тој момент беше логично“.
