Киев, 19 септември 2022 (МИА) – Украинскиот претседател Володимир Зеленски изјави дека на некого може да му се чини дека по серијата победи на вооружените сили на Украина, дошло до одредено затишје, но нагласи дека тоа е подготовка, бидејќи, како што истакна, цела Украина мора да биде слободна.
Во синоќешното видео-обраќање тој соопшти дека украинските сили ги ослободиле Изјум, Балаклеја, Купјанск и Харковската област, но оти ќе бидат ослободени и Мариупол, Мелитопол и Херсон, како и другите делови на Украина, пренесува Укринформ.
„Можеби сега на некого од вас му се чини дека по серијата победи имаме некакво затишје. Но, тоа не е затишје. Тоа е подготовка за следната серија. За следната серија на многу важни зборови за сите нас, кои мора да се слушнат. Затоа што Украина мора цела да биде слободна“, рече Зеленски.
Тој повтори дека Киев не само што ќе ги ослободи териториите што ги контролираше пред руската инвазија, туку и делови од Донбас и полуостровот Крим кои се под руска окупација од 2014 година.
