Oгромна лага е дека во време на директорувањето со ЕЛЕМ на претседателот на партијата – Христијан Мицкоски, се купувало скапа струја и поскапела струјата, велат од ВМРО-ДПМНЕ, обвинувајќи ја владејачката и, според нив, „антимакедонската“ СДСМ, дека секогаш кога спроведува криминал и прави предавства се служи со лаги.
Според ВМРО-ДПМНЕ, фактите се следниве:
1. Откако Мицкоски е именуван за советник во владата Април/2015 година, до негово разрешување како генерален директор на ЕЛЕМ во Август/2017 година, струјата за граѓаните поевтинува од 4,47 ден/kwh на 4,45 ден/kwh или околу 0,5%, а до скоро граѓаните плаќаа 5,87 ден/kwh или за околу 32% поскапа струја од времето кога претседателот Мицкоски е разрешен од местото генерален директор на ЕЛЕМ, или по последното поскапување од 1ви јули оваа година, граѓаните плаќаат за 50 % поскапа струја, а стопанството, поточно компаниите за 400% поскапа струја.
2. Мицкоски ЕЛЕМ го остави со полна каса, цели 30 милиони евра, поточно 25 милиони евра депозити и 5 милиони евра пари на сметка. Сега долгот на компанијата е близу 30 милиони евра.
„Недомаќинското работење, криминалот и незнаењето да се работи се главните причини зошто граѓаните плаќаат за 50%, а компаниите за 400% поскапа струја.
Заклучокот е јасен.
Ковачевски, за да си ги покрие поразите и предавствата, лаже. Вистината е дека со Мицкоски како директор на ЕЛЕМ струјата поевтини, а денес со антимакедонската СДС се плаќа за 50% поскапа струја, а ЕЛЕМ има долгови од 30 милиони евра“, наведуваат од ВМРО-ДПМНЕ.
