„Тоа што го видов кај Ирпињ уште еднаш ме убеди колку нашиот став за осуда на оваа воена агресија е оправдан. Пронајдени се телата на бројни цивили, додека над 70 отсто од зградите се целосно или делумно уништени, вклучително болници и образовни институции“, изјави министерот за надворешни работи Бујар Османи денеска во Ирпињ, на периферијата на Киев, при неговата посета на Украина.
Невидената и неиспровоцирана агресија претставува „тешко кршење на меѓународното право, напад врз суверена земја и сериозен обид да се уништат темелите на меѓународната безбедност и стабилност“, порача Османи.
За неговата посета на Украина, тој посочи дека тоа е чин на поддршка и солидарност, а сцените таму, како што рече, се доказ за неразумната и деструктивна политика која стои зад нив, порача Османи.
Во Киев, шефот на македонската дипломатија се сретна со неговиот украински колега Дмитро Кулеба.
„Слободата на Северна Македонија и секоја друга европска земја денес се брани во Украина и Украина ја заслужува сета почит помош и поддршка поради тоа“, изјави Османи по средбата, додавајќи дека нашата држава од почеток се приклучи кон сите мерки на осуда и санкции против Руската Федерација.
Како што соопшти МНТА, централна тема на разговорите на оваа, втора во период од само неколку недели, средба со Кулеба, била руската агресија врз Украина и нејзините последици врз украинската држава и граѓани, но и пошироко.
„Соговорниците се сложија дека во прашање е грубо кршење на меѓународното право и неиспровоциран напад врз суверенитетот на една земја, но и сериозен обид да се уништат темелите на регионалната и глобална безбедност и стабилност“, се вели, исто така, во соопштението.
Османи и Кулеба разговарале и за европската перспектива на двете земји, влијанието на украинската војна во тој контекст и потребата процесот да го добие своето зголемено внимание, согласно новата геополитичка и безбедносна динамика.
За време на својата посета во Киев, Османи ја реотвори Амбасадата на земјава во Украина, со што таа е ставена во полна функција.
„Ова не е само симболичка порака, туку суштински израз на пријателство и солидарност кон украинскиот народ и држава“, порача министерот.
Извор/фото: МИА
