Лондон, 23 мај 2022 (МИА) – За првите три месеци од својата „специјална воена операција“ во Украина, Русија најверојатно претрпе жртви колку Советскиот Сојуз за време на својата деветгодишна војна во Авганистан, се наведува во најновиот извештај на британското Министерство за одбрана.
Комбинацијата на „лоша тактика, ограничена воздушна поддршка и недостаток на флексибилност“ и пристап кон командата што се карактеризира со подготвеност да се повторат грешките, доведоа до големи загуби, се наведува во извештајот на британското разузнавање.
Русите продолжуваат да акумулираат загуби во офанзивата на Донбас, додаваат британските разузнавачи во утринскиот извештај.
Руската јавност во минатото покажа дека е чувствителна на загубите во војните. Како што се акумулираат загубите во Украина, тоа ќе стане уште поочигледно, а јавното незадоволство од војната може да се зголеми, како и подготвеноста тоа јавно да се каже, се наведува во извештајот на разузнавачите од британското Министерство за одбрана.
