Претседателот на Украина, Володимир Зеленски, во синоќешното обраќање изјави дека Русија претрпела стратешки пораз во Украина и оти тоа му е јасно на целиот свет.
„На Русија ѝ недостасува храброст да го признае тоа“, рече Зеленски, додавајќи дека руските сили се „кукавици“ кои се обидуваат да ја скријат вистината зад ракетни, воздушни и топовски напади.
Во интервју за италијанската државна телевизија РАИ, пак, синоќа Зеленски изјави дека е подготвен да разговара со рускиот претседател Владимир Путин, потенцирајќи дека мора да се најде договор кој нема да биде основан на руски ултиматум како услов.
Зеленски рече и дека Украина никогаш нема да го признае Крим како дел од Русија.
„Крим секогаш имал своја автономија, има свој Парламент, но, внатре во Украина“, рече украинскиот претседател.
Зеленски ја коментираше и изјавата на францускиот претседател Емануел Макрон – дека „Европа никогаш не смее да подлегне на искушението на понижување или духот на одмазда по прашањето за руската војна против Украина“. Зеленски повтори дека тој и Украинците единствено сакаат руската војска да ја напушти нивната земја и додаде дека не е нивна задача ниту намера да го чуваат образот на Путин а тоа да го плаќаат со својата територија, што би било, рече, неправедно.
„Мораме да размислуваме за иднината на Русија. Јас, како претседател на Украина, велам дека тоа се наши соседи. Ќе има и други претседатели и други генерации, додаде украинскиот претседател.
Претходно „Политико“ објави дека Зеленски потврдил дека Макрон побарал од Украина да направи отстапки во поглед на својот суверенитет за да запре војната и „да му помогне на рускиот лидер Владимир Путин да си го сочува образот“.
Елисејската палата денеска ги отфрли таквите наводи:
„Претседателот на Републиката никогаш не разговарал за ништо со Владимир Путин без согласност на претседателот Зеленски и никогаш не побарал никакви отстапки од претседателот Зеленски. Тој секогаш велел дека Украинците треба да одлучат за условите на нивните преговори со Русите“, порача Париз.
