Претседателката на Европската комисија – Урсула фон дер Лајен, оцени дека со денешното присуство на лидерите на ЕУ, САД, Велика Британија и Канада, Брисел стана „центарот на слободниот свет“.
„Нашите врски се посилни од кога било. Одлучивме да ја зајакнеме нашата поддршка за Украина, да ги заостриме санкциите против Русија и да се ослободиме од руските фосилни горива“, рече фон дер Лајен.
Доаѓајќи на самитот на лидерите на ЕУ, а по самитот НАТО и Г7, таа посочи дека утре со американскиот претседател Џозеф Бајден ќе го претстават новото поглавје од меѓусебното енергетско партнерство и најави дека дополнителни количества течен природен гас ќе пристигне во Европа од САД, во замена за тој од Русија.
Бајден денеска пристигна во Брисел „за да му порача на рускиот претседател Владимир Путин дека додека трае руската инвазија на Украина, западниот сојуз е посилен од било кога“, пишуваат светските агенции.
Според советникот за национална безбедност на САД – Џејк Саливан, посетата на Бајден има за цел да го зацврсти американскиот одговор на „трите критични фронта“ – опремување на Украина со воена опрема, наметнување поголеми трошоци за Русија, како и зајакнување на западниот сојуз.
Со учеството на Европскиот совет, Бајден станува првиот претседател на САД кој физички присуствувал на самит на ЕУ.
Извор: МИА
