ВМРО-ДПМНЕ продолжува да го крши Уставот a последен е случајот во општина Кисела Вода, обвинија од владејачката СДСМ, од каде потенцираат дека тие нема да дозволат прекршување на законите.
„Наместо фокус на теми кои се во интерес на граѓаните на локално ниво, ВМРО-ДПМНЕ продолжува да го крши Уставот.
После Штип и Аеродром, денеска истото се случува и во Кисела Вода.
Со непочитување на уставното име на државата во Општина Кисела Вода, ВМРО-ДПМНЕ и градоначалникот Орце Ѓорѓиевски го прекршуваат Уставот на државата.
Свечените изјави каде намерно не е наведено уставното име се нелегитимни и истите не се потпишани од советниците од СДСМ и коалицијата кои ја напуштија седницата на Советот“, реагираат од партијата.
„СДСМ и коалицијата нема да дозволат ВМРО-ДПМНЕ и Мицкоски да го поништуваат Договорот од Преспа, да нѐ втурнат во нови кавги со Грција и другите соседи, да нѐ внесат во конфликт и внатрешна омраза и да поништат сѐ што постигнавме заедно во овие четири години“, се додава во соопштението.
