Контроверзниот нон-пејпер за спорот со Бугарија, вицепремиерот за европски прашања Никола Димитров првпат го добил од новинар, заедно со новинарско прашање дали истиот е веродостоен, откри тој денес во гостувањето во „Утрински брифинг“.
Според начинот на кој е напишан и формулациите во него, нон-пејперот личи на „балканска ујдурма“, оценува Димитров.
„Првиот впечаток ми беше… бидејќи многу имам читано и ‘нон-пејпери’ и официјални документи… во англиската граматика, терминологијата и во суштинските тези, приодот кон проблемот на македонско-бугарските односи во последните две години е многу далеку од реалноста. Направив неколку телефонски разговори и јасно е дека некој прави некаква идеја. Сигурно, претпоставувам дека е од регионот, некој тука. Бугарија е пред избори, кај нас има локални, а можеби е и некаква домашна ујдурма малку да се подзоврие таа тема, па малку и некој политички поен можеби, меѓутоа сѐ тоа се шпекулации“, изјави Димитров.
Во врска со односите со Бугарија, Димитров вели дека на тој план не се случува ништо со оглед на тоа што Бугарија е пред трети вонредни парламентарни избори кои ќе се одржат заедно со претседателските.
„Има контакти на дипломатско ниво, на експертско и работно ниво, ние сме сепак соседни држави. Но јасно е дека политички соговорник нема и треба да чекаме бугарскиот народ да се одлучи на избори“, изјави Димитров.
