Нема доволно правда, а разочарувањето на граѓаните го дели и самиот Никола Димитров, носител во изборната единица 1, кој денеска се обрати до оние што не знаат или не планираат да гласаат. Тој вети дека следната голема битка ќе биде токму битката против корупцијата и криминалот и вети дека тој лично ќе се бори за правна држава со истиот жар со кој се изборил за членство во НАТО и на доближување до пристапни преговори со ЕУ. Обраќањето го пренесуваме во целост:
„Почитувани граѓани, Денес како кандидат за пратеник сакам да се обратам, посебно на тие меѓу вас коишто се разочарани.
И jас, заедно со многу од вас, марширав по улиците. Покренат од злото што сите го чувме со сопствени уши. Барајќи правда извикувајќи, нема правда нема мир!
Нема доволно правда. И ако ме прашате дали сум и jас разочаран, апсолутно сум.
Но, да кренам раце, на краj памет не ми доаѓа. Во мојот ресор, душата jа оставив. Таа огромна планина се искачи, постигнавме децениски цели, влеговме во НАТО и на чекор сме од почеток на пристапни преговори со ЕУ, во фаза сме кога се разговара за таа динамика и се усвојува преговарачката рамка.
Денес сакам да ви ветам лично jас, истата таа жар и енергија што ги вложив за првата голема планина, ќе ги вложам за оваа држава да има правда. Сега кога безбедноста, предвидливоста, иднината и границите веќе не се прашања, на сите jасно коjа е следната голема битка, тоа е битката против корупцијата, криминалот и подземјето.
Сакам да ве повикам, сите тие коишто се мислите дали да сте дома и дали да излезете на 15-ти jули и да гласате. Сакам да ве повикам, да излезете. Имаме огромна шанса како нација, имаме закон за јавно обвинителство што овозможи истрагите и случаите да не застарат, да не се пикнат под килим и го имаме огромниот рефлектор што ни го носи пристапниот процес со Европската Унија. Мораме да ја искористиме оваа шанса, бидејќи следна, нема да имаме.
Од другата страна, имаме политичка партија ВМРО – ДПМНЕ чијашто основна цел е да се скршне од патот. Да нема ниту одговорност, ниту да има правда. Гласот за ВМРО – ДПМНЕ и за нивните сателити е бело знаме, предавање во однос на правдата, меѓутоа и седењето дома е бело знаме и предавање во однос на правдата.
Без вашата поддршка оваа шанса ќе ја испуштиме од раце. Одвај jа вративме земјата, да не дозволиме да отиде во неповрат. Од оваа страна ѕирка надеж, другата страна е назад кон бездната. Ве повикувам сите, да излеземе, да ја зграпчиме шансата и да одиме напред.
Ќе го повторам моето лично ветување, без разлика каква позиција ќе имам и во каква улога ќе бидам, јас лично, ќе бидам вашиот глас за правда и ќе има правда во татковината.“
