„Преговорите со ЕУ се огромна шанса да создадеме европски услови за живот и работа за македонските граѓани“, истакна министерот за надворешни работи Никола Димитров на денешниот видео состанок заедно со вицепремиерот за европски прашања Бујар Османи, ЕУ амбасадорот Самеул Жбогар и амбасадорите на ЕУ земјите членки во земјата, кој се одржа на иницијатива на хрватската амбасада во Северна Македонија, а по повод одбележувањето на крајот на шестмесечното претседавање на Хрватска со Советот на ЕУ.
На состанокот се разговараше и за најновите случувања во ЕУ и на домашен план, како и за предизвиците со кои се соочуваат земјите од ЕУ и регионот на Западен Балкан во справувањето со КОВИД 19 пандемијата, информира МНР.
„Уверени сме дека во втората половина на годината, нашите тимови ќе започнат со конкретната работа врз поглавјата односно кластерите на законодавството на ЕУ, како што е според новата методологија за водење на преговорите. Заедно со Амбасадорите на ЕУ разменивме мислења околу состојбата со коронавирусот на европскиот континент и изразивме надеж дека започнатото единство и солидарност во справувањето со оваа закана помеѓу ЕУ и регионот на Западен Балкан ќе продолжи и понатаму со уште поголем интензитет и координација, особено во претстојниот период кога полека ќе започнат да се отвораат границите за слободно патување на нашите граѓани и ќе биде потребно да се обезбеди економско закрепнување за нашите компании“, истакна Димитров.
Димитров, воедно, се заблагодари за силната поддршка на Хрватска за европската перспектива на земјата, истакнувајќи дека токму во нејзиното претседателство со Советот со ЕУ се донесоа важни одлуки за политиката на проширување на ЕУ, а особено одлуката за Северна Македонија за почеток на ЕУ пристапните преговори.
„Хрватското претседателство во мошне тешки околности и големи предизвици успеа да ја одржи политиката за проширување високо на агендата на ЕУ и тоа е големо постигнување“, рече Димитров.
На средбата била потврдена и посветеноста на Северна Македонија за продолжување по европскиот курс, реформските процеси и унапредување на добрососедските односи и било истакнато дека Северна Македонија е подготвена и со нетрпение го очекува усвојувањето на преговарачката рамка и закажувањето на првата меѓувладина конференција што ќе означи конкретен почеток на преговорите.
