Европската куќа на фудбалот попладнево соопшти дека се одложени два натпревари од Лигата на шампиони, односно ревашните помеѓу Манчестер Сити и Реал Мадрид и Јувентус и Лион.
УЕФА следната недела ќе разговара за иднината на Лигата на шампиони, Лига Европа и ЕВРО 2020, но во меѓувреме одлучи да одложи два натпревари од осминафиналето во најелитното европско натпреварување.
Следната недела нема да играат Манчестер Сити-Реал Мадрид и Јувентус-Лион. Европската куќа на фудбалот немаше друг избор откако во карантин се ставени фудбалерите на Реал Мадрид и Јувентус.
„Кралевите“ се во изолација откако член на кошаркарскиот тим е позитивен на коронавирус, а „бјанконерите“ се во изолација откако Даниеле Ругани стана првиот играч во Серија А заразен со Ковид 19.
Во моментов нема информации за мечот помеѓу Барселона и Наполи, кој исто така сигурно ќе бдие одложен поради забраната за летови од Италија која беше воведена од властите во Шпанија, и поради која веќе беа одложени два меча од Лига Европа.
