На почетокот на годината беа изгласани измените во Уставот со кои новото име на државата стана Република Северна Македонија. Се одржаа претседателски избори на кои победи Стево Пендаровски. Земјата е на чекор до НАТО, но по „топлата“ препорака од мај, стигна „студеното“ НЕ од ЕУ. Сепак се чини дека најголемо интересирање кај јавноста предизвика аферата Рекет.
Во почетокот на 2019 година, поточно на 11 јануари, по период исполнет со неизвесност дали ќе биде обезбедено неопходното двотретинско мнозинство, преговори, предлози, протести пред Собранието, обвинувања од опозицијата за уцени на нивни пратеници, беа изгласани измените во Уставот врз основа на претходно постигнатиот Преспански договор, со кои новото име на државата стана Република Северна Македонија.
„Констатирам дека Собранието го донесе Уставниот закон за спроведување на амандманите од 33 до 36 на Уставот на Република Македонија“, рече претседателот на парламентот Талат Џафери по гласањето „За“ од страна на 81 пратеник.
Освен претставниците на владејачката коалиција и партиите на Албанците, за измените гласаа и 8-мина членови на независната пратеничка група, порано пратеници на ВМРО ДПМНЕ и коалицијата. Во нивно име за време на дебатата се обрати министерката за култура од времето на владата на ВМРО ДПМНЕ, Елизабета Канческа Милевска.
Продолжете на РСЕ
