За Rebecca Leigh секој би оценил дека е во одлично здравје. А и како нема да биде, кога е позната фитнес т.н. инфлуенсерка на Инстаграм и редовно воодушевува со нејзините инструкции за тешки јога пози и останати вежби.
Меѓутоа, неодамна на Ребека ѝ се случило тоа што никогаш не помислувала дека може да ѝ се случи при такво фит и здраво тело – додека снимала видео за своите 27.000 фанови и изведувала тешка јога поза (стоење на раце со свиен грб и врат), доживеала мозочен удар.
Прво ѝ се замаглило пред очите, а потоа рацете и нозете почнале да ѝ се тресат. По направениот CT ангиографски преглед, докторот ѝ соопштил дека дошло до затнување на десната каротидна артерија, што потоа довело до мозочен удар. На Ребека не ѝ се верувало, но докторот воопшто не се шегувал.
„Тоа што ѝ се случило на Ребека обично е резултат на екстремно или изненадувачко движење на вратот, до кое може да дојде дури и при силно кашлање или кивање, или пак екстремна ротација на вратот при јога или танцување“, вели Мерседех Хосеини, специјалист за мозочни удари, за магазинот „Health“.
Според една студија објавена во 2012-та, јогата, иронично, помага при опоравување од мозочен удар. Според студија од 2013-та, меѓутоа, јасна е поврзаноста со ризиците од мозочен удар поврзани со јогата. Студијата открила бројни случаи во кои јогата, особено позите со стоење на глава, довеле до разни повреди, па и мозочни удари.
„Ја објавив мојата приказна за да ги предупредам другите дека мозочниот удар е нешто што секому од нас може да му се случи, без разлика колку години имаме и колку и здраво да живееме“, вели Ребека.
Меѓутоа, нејзината приказна наиде и на критики. Ја обвинуваат дека не го ценела своето здравје, а има и такви што сметаат дека поради претерување со јогата таа заслужила да ѝ се случи дури и полошо.
Во секој случај, Leigh сè уште има последици од мозочниот удар, пред сè оштетување на нервите, што засекогаш ќе влијае на нејзиниот секојдневен живот. Таа пак, се однесува како да вредело.
„Знам дека никогаш нема да бидам најдобра во јога, но фактот што можам да си допрам прстите на нозете доволен ми е за насмевка“, вели.
Тука неизбежно се поставува прашањето: А што ако не поминела толку лесно? Нека тоа не ве одврати од вежбање и јога, но нека ве одврати од глупирање и претерување за на Инстаграм.
Во моментот на мозочниот удар Leigh имала 39 години.
