Во градот Ратомка во Белорусија, на пет километри од Минск, има една куќа од која локалните ги лазат морници. Некои од нив ја избегнуваат по секоја цена, особено ноќе. Децата дури и преку ден. Со раце од скелети што се подаваат од камената ограда, со ѓаволи на кровот и со црни скелети што го сочинуваат покривот на некаква структура со купола, не е ни чудно.
Откако група жители од соседството се пожалија до општинската управа, куќата стана вирална во Белорусија.
„Ја фотографирав со телефонот за да им ја покажам на колегите на работа, а потоа веднаш ги избришав сликите. Не сакам такви ѓаволи во мојата телефонска меморија“, вели извесна Марија Николаевна. „Од далеку куќата изгледа убаво. Внука ми мислеше дека е замок од бајка. Но кога се доближивме и ги видовме рацете на оградата и ѓаволите на кровот, бевме шокирани. Сега веќе не поминувам со внука ми во близина на куќата. Страшна е за деца, а навечер дури и за возрасни, особено кога тие мали метални ѓаволи го рефлектираат светлото“.
Првиот комшија си има уште поголема мака. Не само што е прв комшија, нели, туку забележал дека еден од ѓаволите нишани со стрела директно кон неговиот прозор. Оттогаш не е раат.
Инаку, според соседите, сопственикот на куќата е сосема обичен бизнисмен. Почнал да ја гради куќата пред една декада, ама потоа заминал во странство на 8 години. Се вратил пред две години и продолжил со изградбата. Сега куќата е скоро готова. Тоа „скоро“ дополнително ги плаши локалните. Што ако типов додаде уште некој страшен елемент?
Кој ќе го знае што му се врти во главата на сопствеников. Едно е сигурно, хорор фасадата е добар метод за безбедност од крадци. А којзнае, може не планира да живее таму. Може комшиите нешто му згрешиле, па сега вака им враќа…
