Во Белгија очигледно претстојат уште антитерористички операции, откако вчера властите не успеаја да фатат еден од организаторите на нападите во Франција – Салах Абделслам.
Нарекуван “најбараниот човек во Европа”, Салах не го завршил делото во Париз и не се разнесе, како што било според плановите на терористите. При нападите сепак загина неговиот брат – Брахим, кој го активира појасот со експлозив крај францускиот ресторан, при што настрадаа 15 лица. Откако беше пронајдена “белгиска” трага во нападите, полицијата на земјата се активира и во срцето на Европската унија беа одржани бројни антитерористички операции. Властите побараа да не се шират информации за нив на социјалните мрежи, во корист на истрагата. Затоа Белгијците најдоа друго решение – тие ги наполнија профилните слики со мачиња. Трендот започна од пародиен сајт кој создаде и специјален херој за оваа намена – Абу Мјау – маче со ремен од експлозиви.
За време на антитерористичките операции синоќа, кога полицијата ги повика жителите на Брисел да не споделуваат информации за тоа каде се наоѓаат специјалните единици, Twitter и Facebook беа преплавени со слики на на мачиња во секакви улоги, објавени со хаштаг #BrusselsLockdown.
При акциите беа уапсени 16 лица, а портпаролот на полицијата посебно им се заблагодари на медиумите и на Белгијците за тоа дека се усогласиле и не објавиле фотографии од работата на полицајците. Во меѓувреме денес Брисел повторно останува блокиран. Не работат училиштата, градинките и метрото. Властите ги повикаа вработените да работат од дома, а болниците примаат само итни случаи.
