Од денеска до 26 ноември во Скопје ќе се одржи шестото издание на Меѓународниот фестивал за филмови снимени со мобилен телефон „Мобил Фестивал“.
Денес ќе бидат одржани неколку филмски работилници и проекции. Утре во кино „Фросина“ во Младинскиот културен центар ќе се одржат проекции на детски анимирани филмови синхронизирани на македонски јазик „Големата авантура на Пим и Пом“ и „Детето Фантом“. На 24 и 25 ноември во Кинотека на Македонија ќе се случат и проекции на тинејџерските филмови „Созревањето на Ева Ван Енд“ и „Одење до Месечината“ придружени со филмски работилници чија заедничка цел е поттикнување и развој на кино културата кај младата публика.
Конкурсот за пријавување на филмови за шестото издание на „Мобил Фестивал“ завршува денеска, а од пристигнатите филмови, жирито во состав Валентино Скендеровски Бесфорт Имами Игор Ангелов, ќе ги изберат најдобрите филмови. Филмовите ќе бидат наградувани во категорија најдобар филм „Ратка Илиевска-Лале“, најиновативен филм, најоригинална приказна најдобра идеја, најдобар филм во програмата Млади таленти и најдобра музика во филм во програмата Млади таленти.
Наградите ќе бидат доделени на завршната вечер која ќе се одржи во МКЦ, во кино Фросина, на 26 ноември.
„Мобил Фестивал“ е во организација на продуцентската куќа КТ ФИЛМ И МЕДИА, поддржан од Агенцијата за филм на Република Македонија, и во соработка со Кинотека на Македонија, Факултетот за Аудио-визуелнии уметности-ЕСРА и Центарот за Креативен Развој.
