Најефикасните маркетинг трикови на светските брендови

Ни самите не сме свесни колку од „нашите“ одлуки за купување на одреден производ се должат на добриот маркетинг.

Во својата книга „Скриен маркетинг“, Марк Ендрјуз – креативен директор и психолог од Амстердам, ги истражува тактиките на светските брендови во промовирање на нивните производи. Ги нарекува „скриени уверувања“ и смета дека тие се главниот двигател на глобално-успешните брендови. Овие тактики имаат за цел кај потрошувачите да створат фиктивна дополнителна вредност на производот, а тоа е една од најголемите причини што некои брендови се покупувани од другите. Целата игра почива на темелно истражување и длабоки познавања на психологијата на потрошувачот, а тоа што тој по одредено време станува свесен за дел од тактиките не е сериозна закана, зашто брендовите постојано имплементираат нови. Ова се некои од најефикасните:

1. Персонификација.
Сте посветиле ли внимание на буквата „Е“ на пивото Хајнекен? Вашата потсвест, сигурно. Ако ја споредите со останатите букви, ќе забележите дека „е“ е благо навалена наназад, а дното и е закривено, така да потсетува на човечка насмевка.
„Нема ништо човечко во буквите, ама тој е впечатокот“, вели Ендрјуз. „Тоа ви создава потполно поинаков однос кон брендот“.

Факт е дека колку производот е „почовечен“, толку полесно се поврзуваме со него, а омпаниите се надеваат дека таквите персонифицирани логоа се доволни да нé потикнат да го купиме нивниот производ. Тактиката е многу суптилна, но тоа е и целта.
„Се настојува да им придаваме мисли и чувства на објектите и предметите на сличен начин на кој и ние самите би требало да мислиме и да се чувствуваме додека го користиме производот“, објаснува Ендрјуз. Така потрошувачите можат да сочуствуваат со шише пиво или производ за чистење. „Што повеќе ви се допаѓа рекламата за производот, поголеми се шансите да го купите“.

2. Екстра вредност
Најголемиот дел од потрошувачите не знаат многу за составот или вредностите на одреден производ. Сепак, кога некоја посебно е истакната, тие секако ќе и придадат важност.
Мозокот се води по логиката „што повеќе, тоа подобро“. На пример, на некои од новите телевизори, покрај другите спецификации што на просечниот купувач малку му значат, стои „28 милиони бои“. За сите што не се разбираат од технологија, тоа значи „Аха, боите ми се важни! Повеќе сигурно е и подобро!“, па автоматски победува телевизорот со најмногу бои. Она што просечниот купувач не го знае е дека човечкото око гледа само 256 нијанси сива т.е. 16.7 милиони бои.

Сличен пример се и мегапикселите, кои се истакнуваат како најважна карактеристика на фотографските апарати и камерите на мобилните телефони. Едно време, таквиот маркетинг и имаше смисла, бидејќи разликата од 1 до 2 мегапиксела е очигледна и резултира со далеку подобар квалитет и големина. Но, генерално, сé што е над 5 мегапиксела е маркетингшки трик. Просечните корисници, кои немаат познавања за фотографски термини како бленда, експозиција или чувствителност на филмот, наивно ги прифатија мегапикселите како симбол на квалитет, што пак и овозможи на Нокиа да „растури“ со моделот Lumia 1020, рекламиран во прв план како телефон со камера со неверојатни 41 мегапиксели.

3. „Количините се ограничени“
Ако купувате на Интернет, често ќе забележите напомени од типот „уште еден производ преостанат“. Ништо не може да го мотивира купувачот така силно како стравот дека ќе остане без саканиот производ или дека подоцна ќе треба да го плати поскапо.

Ендрјуз нагласува дека тој страв е делумно вкоренет во нашите умови, особено во главите на оние кои преживеале периоди на економска криза или санкции. Од друга страна, брзото снемување на одреден производ сугерира дека го купиле многу други луѓе, што пак сугерира дека вреди. Само уште еден трик, кој толку добро функционира на принцип што не потсетува дека наскоро ќе ја изгубиме „слободата на избор“.

4. „Одобрени“ производи
На големо се игра и на картата на човековата несигурност. Често избираме фризери, механичари и ресторани кои ни ги препорачале пријателите, а и производите ги купуваме по усна препорака од некој близок. По истиот принцип, наклонети сме да ја купиме пастата за заби на која стои одобрување од некој медицински институт. „Колку повеќе луѓе го одобруваат користењето на некој производ, поверојатно е дека повеќе ќе им се допадне на потрошувачите“. Фејсбук и лајковите се добар аргумент што го потврдува ова сознание. Дури и едноставното „Девет од десет луѓе го избраа X“ може наголемо да влијае врз човековото однесување, нагласува Ендрјуз.

Важно е да се има во предвид дека маркетингшката методологија постојано се менува и константно имплементира нови тактики кои ќе обезбедат повеќекратен ефект на пазарот. Затоа, информирајте се.