Со својот софистициран изглед и добри манири Одри Хепберн ги постави мерилата како треба да изгледа една дама. Таа и денес е икона на женственоста и пример на многу припаднички на понежниот пол кои не сакаат слепо да ги пратат трендовите.
Познатата актерка често пати во интервјуа истакнуваше кои се одликите на една дама со стил и наведуваше што е потребно за да се постигне отмен изглед. Еве ги нејзините совети:
Гардероба
Одри секогаш носела гардероба што ѝ прилега, никогаш не купувала облека со помал или поголем конфекциски број. Постојано истакнувала дека удобноста ѝ е прво мерило кога одбира гардероба.
Совет: Носете го тоа што вас ви се допаѓа и што најдобро ви стои. Со гардеробата треба да го истакнете тоа што е најубаво на вашето тело. Не им робувајте на модерните парчиња само за да бидете во тек со трендовите. Потрудете се да изградите сопствен стил.
Балетанки
Иако чевлите со висока штикла отсекогаш биле симбол на женственоста, Одри покажа дека и во балетанки може да изгледате префинето.
Совет: Спуштете се од штикли, ќе се движите полесно и побрзо. Во балетанки изгледате женствено, елегантно, но и урбано. Може да ги носите во секоја комбинација.
Очила
Сетете се на Одри Хепберн во филмот „Појадок кај Тифани“ во кој пленеше со својот прекрасен изглед и преслатко лице на кое се истакнуваа големи очила.
Совет: Дополнете ја вашата колекција на очила за сонце со еден модел со големи стакла затоа што токму такви очила ѝ даваат на жената дамски и по малку мистериозен изглед.
Дизајнери
Сакала да носи брендирана гардероба со потписот на „Givenchy“ и накит од „Tiffany“ и „Cartier“, но често влегувала и во бутици во кои не се продавала дизајнирана гардероба. Уживала во тоа да пронаоѓа непознати трговски марки и токму таа да ги промовира на џет-сет забавите.
Совет: Уметноста на облекување е во тоа вешто да ги искомбинирате облеката и аксесоарите, а не во носењето на модели со потпис на некој светски познат креатор. Не е потребно сѐ што имате да биде со врвен квалитет.
Нега
Одри секогаш имала средени веѓи и совршено маникирани раце. Шминката ѝ била во втор план.
Совет: Не е сѐ во шминкањето, луѓето околу вас нека забележат дека сте негувани и уредни.
Став
Одразот на личноста на Одри беа токму нејзиниот став и држење.
Совет: Исправете се. Доброто држење е многу важно за впечатокот што го оставате.
И за крај една позната изрека на славната актерка: „Ако сакаш да имаш прекрасни усни, кажувај само љубезни зборови. За блескав поглед пресудно е да го бараш само доброто во луѓето. Ќе имаш витка става ако ја делиш храната со гладните. Ако сакаш квалитетна коса, дозволи им на твоите деца да ја чешлаат“.
