Министерот за внатрешни работи Оливер Спасовски треба да ја напушти Владата доколку не се согласува со носење на законот за амнестија, смета лидерот на ВМРО-ДПМНЕ, Христијан Мицкоски.
Мицкоски, кој денеска присуствуваше на почетокот на кампањата „Важно е! Од тебе зависат промените“ во Охрид, рече дека Спасовски има две опции.
„Едната опција е ако не се согласува да ја напушти владата“, рече Мицкоски.
Втората опција која ја има Спасовски, според лидерот на опозицијата, е да молчи и да прифати дека тие коишто се опфатени со овој закон се озлогласени криминалци, луѓе кои што тргувале со недозволени супстанци или познати како нарко дилери, переле пари, вршеле изнуда, правеле насилство и така натаму.
„И тие треба да добијат намалени затворски казни или дел од нив да добијат и целосна амнестија, за да потоа се најдат повторно на улиците и да повторно прават проблеми и го тероризираат чесниот граѓанин во Македонија“, додаде Мицкоски.
Министерот за внатрешни работи досега во повеќе наврати за медиумите, а првпат во саботата, изјави дека не гледа потреба од ваков закон, дека сега не е моментот за такво нешто и, најважно, дека амнестија нема да го реши проблемот со пренатрупаност во затворите, пред сè затоа што голем дел од амнестираните ги повторуваат делата и повторно завршуваат во затвор за пар месеци.
Владата, инаку, го достави законот за амнестија по скратена постапка, во Собранието, и сè уште нема информација кога тој ќе биде ставен на дневен ред.
