„Многу се надевам дека Северна Македонија ќе ги добие неопходните гаранции од нас и ќе оди по патот кон присоединување кон Европската унија. Потребно е да се направат неопходните компромиси, како што многу други направија. Ние сме должни, кон сегашните и идните генерации, да постапиме така што Република Северна Македонија, Албанија и земјите од Западниот Балкан на никој начин нема да бидат запрени на патот кон Европската унија“, изјави бугарскиот премиер Бојко Борисов на средбата со шефот на македонската дипломатија – Бујар Османи, кој е во посета на Бугарија.
Како што пренесува БГНЕС, во рамките на разговорот, Борисов посочил дека е многу вознемирен од вклучувањето на ОМО „Илинден“ и „македонското малцинство“ (во наводници стои во бугарските медиуми) во Бугарија во една од политичките резолуции на ЕУ. Тоа, истакнал тој, во никој случај не е од полза во дадениов момент кога се бара компромис, ниту за историчарите, а ниту за политичките партнери во Република Северна Македонија, кон наоѓање на решение на спорот.
Според Борисов, веќе уште од денешната средба треба да започнат разговори на сите нивоа, за да може до 10 ноември – кога Бугарија и Македонија како копретседавачи на Берлинскиот процес ќе претседаваат со Самитот, да се најде компромисно решение кое ќе биде задоволително за сите страни:
„Имате многу работа. Тоа е многу сложен, многу брз и истовремено многу важен и неопходен процес“, истакнал тој.
„Вашите граѓани треба да знаат дека во Бугарија имате и секогаш сте имале најголема поддршка и дека едноставно треба да направиме историјата да биде мост на пријателството и блискоста, а не скршен мост по кој Република Северна Македонија не може да помине. Така што, овде политички игри не треба да има“, посочил понатаму Борисов, додавајќи дека перспективата и моментот се исклучително важни и „би било грев пред историјата ако сегашните политички раководства на Бугарија и Република Северна Македонија не успеат да најдат компромис“. „Нема да нѐ разбере ниту светот“, заклучил бугарскиот премиер.
