„Демократската унија за интеграција изгледа се чувствува прекомфорна и комотна во оваа тригодишна коалиција со СДСМ и мисли дека начинот на кој што функционира со СДСМ такви се сите останати политички партии. Она кое што сакам да им го порачам еве и на нив овде од Куманово е да внимаваат како се однесуваат, бидејќи на Македонците, но и на останатите граѓани во Македонија, им е дојдено веќе преку глава да бидат граѓани од втор ред и таков тип на барања може да ги задржат само во сопствените редови за храбрење и мотивација на сопственото членство“, рече лидерот на ВМРО-ДПМНЕ денеска во Куманово, прашан како го коментира потегот на ДУИ која вчера преку своите млади активисти кои ги промовираат иницијативите „Зошто да не“ и „Верувам“, пред седиштето на ВМРО-ДПМНЕ (како и на СДСМ) порача дека е време за прв премиер Албанец.
Мицкоски додаде дека ВМРО-ДПМНЕ е политичка партија која се обраќа на сите граѓани без разлика на нивната етничка припадност во Македонија и ѝ се обрати на ДУИ со порака дека нивната реторика и начин на однесување не само што не носи добро, туку напротив, ја заострува ситуацијата во нашата држава.
„Ние ќе одговориме соодветно затоа што поминаа времињата кога ДУИ ќе се чувствува комотно и романтично во Владата на Република Македонија. ВМРО-ДПМНЕ е победник на следните предвремени парламентарни избори заедно со Коалицијата ‘За обнова на Македонија’ и, како што кажав, преку глава им е на Македонците, но и останатите граѓани во оваа држава да бидат граѓани од втор ред. Доаѓа вистинска обнова и доаѓа вистинската сила и на Македонците но и на останатите граѓани во Македонија, после 15-ти јули во Владата на Република Македонија, и ќе им порачам да внимаваат од сега па натаму како се однесуваат и какви пораки рефлектираат во јавноста, затоа што тоа не е добро за сите етнички заедници, вклучително и за албанската етничка заедница во нашата држава“, порача Мицкоски.
